Saturday, January 16, 2010

Udhë për një dhimbje

Më dhëmb një vend
që kurrë s’e kam parë
një tokë e verdhë
e tharë, e çarë
ku fëmijët mbijnë
në rrënjë të kaktuseve
e nga thithkat e gjembave
lëngun thëthijnë.

Më dhëmb një vend
me qiell të zi
kaq larg nga qielli im ngjyrë gri...
meshkujt si pjergull
që drejt s’mund të rrinë
gjuha e tokës i përpin.

Një vend si grua gjoksjashtë
me bërrylin e jetës kockëdalë
lëkurë e zhveshur, e arnuar,
duhmat të nxehta
tokë përvëluar
në mes të vapës
me diell mbuluar.

Një vend që s’është i imi vend
nuk di… nuk di, pse vallë më dhëmb…